اه ه ه ه ه ه ه

الى الشعب المصرى

2009-12-06T05:18:00.000-08:00

الى الشعب المصرى

ايه يا شعب ايه يا شعب لو ما اتلميتشى هنغيرك نجيب شعب مكانك الصبح والشعوب على قفا من يشيل كلهم نفسهم فى النعمه اللى انتو فيها
أمراض خبيثه وغير خبيثه موجود ومتوفر
رئيس بقاله أكتر من 28 سنه فى سده الحكم ولسه بيسد فيها موجود واحتمال يفضل رئيس لحد بعد الموت كمان موجود
انتخابات موجوده وبتروحوا وبتصوتوا كانكم فى ميتم ومع انه اصواتكم ما لهاش لزمه عندنا وورق وحبر سرى ووجع دماغ بس نعملكم ايه شعب دماغه اطفالى ده حتى الاموات عقبالكم خلتونا طلعناهم يصوتوا معاكم تعبتونا
وزراء منورينا طول المده اللى فاتت دى فيهم وزراء من قبل ما يتولد بعضكم موجود وأكبر منك بيوم يعرف عنك بسنه احسبها انت بقه وغير كده هما اساسا رجال اعمال يعنى بيعملوا سحر يعنى اللى هيفتح بقه فيكم هيتمرمط ويبتدى يشوف خيالات ده اذا شاف حاجه اصلا بعد كده
لقينا انفلوانزا الطيور عند غيرنا جيبنالكم منها انفلوانزا خنازير مش حارمينكم منها وأى نوع جديد هنوفرهولكم مالكم بقه
مسابقات 0900 واى زيرو تحبوه هتلاقوا أهو بنتسلى بيكم قصدى بنسليكم
حشيش مخدرات موجود بوفره ابعت أى عيل صغير فى شارعكم لاى ديلر على أى ناصيه هيجيبللك
شركات اتصالات للموبايلات بتاعتكم وعملنالكم شركات اللى تاخدوه با اليمين مرتبات تصرفوه عليها وغير كده وكده بيحسبوا الدقيقه بمزاجهم وعلى راحتهم من غير رقابه ولا ديولو
با النسبه للستات ما نسيناهومش عملنالهم مقاعد مخصوص فى البرلمان هيلاقوا مقاعد بلاستيك وجلد وكنب لو يحبوا كمان علشان يطروا القعده كده اتخنقنا من منظر الخناشير اللى فى المجلس
اخوان مسلمين وجماعات اسلاميه واحزاب عندكم ولا معندكومش عندكم صحيح الاخوان اكتر من نص قياداتهم ممسوك ومحطوط فى المعتقلات بس النص التانى متراقب يعنى كله تمام
الاحزاب هنعيش ازاى من غير ما حد منهم يكون جنبنا من غير ما يهش ولا ينش جماعات اسلاميه اهم فرقعولهم كام قنبله قتلولهم شويه بس الامور تحت السيطره والايام عديت وهنخرجهم بس بشروطنا مش فاضيين بقه لاى وجع دماغ
لجنه سياسات فى بلد تانيه فيها حاجه زى دى مفيش يعنى عندنا وبس متميزين اللجنه دى غايتها تفرحكم وتنعشكم وتخرب بيتكم قصدى تعمر بيتكم
رئيس اللجنه ابن البلد دى صحيح ما اتعلمشى فى مدارس من بتاعه الجهله والفقراء أمثالكم ولا عمره ركب مواصلات وهيركب ليه ما عربيت البلد تحت امره
هتقولوا ا أكالشى من عيشنا ولا فطر فولنا هو برضو حد ياكل العيش ده ولا الفول الحجرى ده غير لاموأخذه ؟؟؟؟
هتقولوا طب ليه عاوزينه يبقى رئيسنا احنا مش موافقين يا سلام وكانه الحاجات دى بمزاجكم خلاص القوطه أكلت أولادها
عندنا عز حد غيرنا عنده عز وحديد عز واحلام عز وامانى عز وبلد عز يعنى عايشين بعز ايه مفيش شكرا لعمو عز
قطارات بتولع وفرنا عبارات بتغرق وصاحبها يخلع موجود ومتجرب جميع انوع المبيدات المسرطنه والقمح الفاسد فاسد فاسد صحيح لقينا الميه مش ملوثه كفايه وانتوا مش حاسين ظبطنا نسبه التلوث بمرض التيفود ايه تانى بس
شباب عاوز يسافر بره جيبناله نصابين ينصبووا عليه ويسفروه عن طريق غير شرعى وكمان خدمه خمس نجوم يغرقوه على سوحل أوربا يعنى مش سواحلنا علشان الجثه ما ترجعلناش تانى هنا وتقرفنا يعنى هيندفن فى بحر نظيف واللى هتطلع جثته على شواطىء اوربا هو يندفن هناك فى مدافن نظيفه واللى هيعافر ويوصل با السلامه هنبلغ عنه علشان ما تقلقوش احنا مش بنسيب ولادنا فى حالهم واللى هيرجع يا اهلا البلد تنور هيصرف كل الفلوس على علاج اهل بيته ما احنا عاملين معاهم الواجب كله
شات ونت موجود واللى عاوز يتعرف اديله ايميللك وما ترحمهوش واللى تقوللك ابعتلى رصيد وهوريلك اللى عمرك ما شوفته قولها بعينك ما المواقع الثقافيه على قفا من يشيل وكده نظرى وكده نظرى
اقسام شرطه على كل الطرازات ضرب عصيان ومخبرين شغال صعق با الكهرباء مع انها بفلوس بس مش بنعزها عنكم نصوركم كمان وانتوا عريانين ملط (نيوتى تودى زى الدنمارك بتاعه عادل امام)(ومش عارف ايه كده كيس ديك)يعنى عاوز ابوسك بس با الدنماركىوشوف بقه مخبرينا مش بيدققوا فى المناطق اللى هيبوسوها والعصيان بتاعتهم ما لهاش عيون
مدارس بسور واطى علشان تهربوا ونكتبكم غياب عاملين حسابنا جامعات تتخرجوا منها وتقعدوا على النواصى عملنالكم نواصى
واللى عاوز يشيش وفرنا جميع انواع الشيش وافخر انواع المعسل ونسيبكم بقه تهاتوا وتقولوا بطاله عاوزين نشتغلوا كانكم اتعلمتم بجد هى دى مناهج دى تخرج اجيال دى يدوب تخرج من الباب الل ورا مش احنا اللى نكتم على نفسكم اتكلموا قولوا عبروا عن مطالبكم براحتكم احنا ودن من طين وودن من عجين
عملنالكم كبارى وطرق كلها مطبات علشان تركب العربيه وانت مستلز كده وعمال تتنطط من الفرحه انك لازم هيجى عليك وقت تقع من على كوبرى تنزل تحت عربيه نقل وغير كده وكده قوانين مرور بتقول تلبس الحزام علشان بعد ما تعمل الحادثه تيجى تخرج نفسك ما تعرفشى الحزام يكتفك لحد العربيه بقه ما تفرقه السر الالهى يطلع لوحده عربيات اسعاف تيجى بعد ما تكون اتحاسبت كمان لانه اصحابك المسافرين قفلوا الطريق والعربيه بتاعه الاسعاف مش عارفه توصل يعنى ميت ميت
. حد ليه شوق فى حاجه ولكى الله يا مصر

من اجللك انت

2009-11-03T04:04:00.000-08:00

من اجللك انت
من اجللك ايها المواطن المصرى الجميل الحبوب الطيوب اوى
من اجللك انت ده الشعار الجديد للحزب الوطنى السمخراطى فى العام الجديد وقبل كده كان فى بلدنا بتتقدم بينا والفكر الجديد وبا التاكيد مصير من اجللك انت هيكون نفس مصير الشعارات اللى قبله بس يمكن هنا الحكومه حددت شىء انه كل اللى حصل واللى هيحصل هيكون من اجللك انت وبكده كل ما تشوف نفسك فى المرايه تشاور على نفسك وتاكد انه انت اللى قالوا عليها بعد اجللك دى هى انت
يعنى هو المبيدات المسرطنه كانت علشان مينن يا مواطن ماهو علشانك انت القمح الفاسد مين هياكله غير حضرتك مين هيغرق غيرك مين هيولع غيرك لا تكون فاكر نفسك يا مواطن هتقدر تهرب من المصايب اللى محضرينهاللك انت لا حاشا وماشا وكلا باتا
تكون افتكرت انه الايام الجايه هتكون احلى من اللى راحت لا يا مواطن السيد الرئيس بنفسه قاله السنه الجديده سنه حاسمه ومن النهارده كده يا مواطن اعمل حسابك على الانتخابات التشريعيه المزيفه الجديده شورى وشعب واللهم ما احفظنا رئاسه تلات مرات ورا بعض
وطبع مش هيحرمك الحزب من بعض المقبلات اللى هتكون مع الحاجات دى ممكن تلاقى مصل انفلوانزا الخنازير انضرب عادى ما تدققش المهم الخنازير ما تزعلشى
وحاول ما تسافرش كتير فى الفتره الجايه دى محدش عارف الحزب مخبى ايه وهتكون المصايب المره الجايه عبارات ولا قطارات اللى شبعنا من بلاويها بس اهو محمد منصور اتشال لانه كان الوحيد السبب
عموما سيدى المواطن الحزب بكل فخر واعتزاز هيعمللك برنامج رهيب فى خلال السنتين الجايين مش هتقدر تغمض عينيك ولا تسد ودانك ولا تتنفس من الاساس هتشوف ايام زى ما قال عليها كتاب الحزب ومهما تكون فاكر انك علشان بتمشى جوه الحيط هنسيبك لا ما تقلقشى هنهد الحيطه فوق دماغك
عموما ايها المواطن معدوم الدخل من اجللك انت حاول تستمتع با الثانيه اللى بتعيشها لانها يمكن تكون اخر ثانيه فى حريتك المزعومه

وحاول ان تجيب على هذا السؤال انت معانا ولا مع الناس التانين

ائتلاف القوى الوطنيه

2008-04-06T09:43:00.000-07:00

تضامنا مع عمال المحله من اجل اجر عادل لكل المصريين يتناسب مع موجات
الغلاء
سبعه وعشرون عاما من الانهيار فى جميع مرافق الحياه
سبعه وعشرون عاما لم يقدم فيها هذا النظام سوى الفساد والبلطجه والبطاله
والفقر لهذا الشعب
سبعه وعشرون عما من النهب لثروات مصر ومواردها
لقد افسد هذا النظام كل شىء وباع كل شىء ولم يبقى لنا الا الضياع
وفقدان الامل فى حاضر كريم نعيشه ومستقبل امن لاولادنا
نعم لقد افسدوا حياتنا بذممهم الخربه احتكروا جميع السلع الضروريه حتى
اصبحنا نكتوى كل يوم بلهيب الغلاء الذى يشعل النار فى بيوتنا جميعا
هاهى ثرواتهم تتضاعف وباارقام خياليه من نهب قوتنا وقوت اولادنا لقد
حولوا مصر وشعبها الى ملكيه خاصه لهم ولاولادهم يبيعون فيها ويشترون ويورثونها
لاولادهم حتى اصبحنا جميعا على مشارف الخطر
ايها الشعب
الحر
هل بقى شئ نخاف عليه
هل ينفع الصبر مع هؤولاء الفاسدين المتربحين من تجويعنا
ما ذا ننتظر

هل ننتظر الموت غرقا فى عباره او فى عرض البحر هروبا من جحيم مصر
هل ننتظر الموت با المبيدات المسرطنه والاغذيه الملوثه او فى طوبير
الخبز
يحمل الائتلاف مسؤوليه التواطئ مع العدو الامريكى والصهيونى ضد سياده الوطن
ومصالح الشعب فى تنميه ذاتيه ومستقله وفى ضمان حقوقه العادله
تدعيم المحتل الصهيونى ببيع الغاز با اقل من سعره فى الوقت الذى يحرم فيه
المواطن المصرى من رغيف الخبز
يدعم الفلاح الامريكى بشراء القمح المسرطن با اغلى الاسعار فى الوقت الذى يبخس
حق الفلاح المصرى عند زراعته
ضاعت الاراضى المصريه واصبح يحكمنا الامريكان وسيطروا على البر والبحر فقتلوا
الشهيد محمد احمد فؤاد البمبوطى فى السويس
ماذا ننتظر فلنتحرك جميعا قبل فوات الاوان فلم يعد ينفع الصمت والانتظار
وليكن يوم السادس من ابريل يوم الغلاء العالمى هو البدايه وليخرج كل منا مدافعا عن
حقه ومطالبه

ائتلاف القوى الوطنيه با البحيره
كان هذا نص البيان وان شاء الله لى لقاء معكم على صفحات المدونه مع
اول خروج ليا فى مظاهره فى حياتى والله الموفق

رساله الى السيد مفتى الديار المصريه سابقا مفتى قصر الرئاسه حاليا فلتقل خيرا او لتصمت

2007-11-12T06:03:00.000-08:00

كلنا فاكرين الفيلم الجميل الزوجه التانيه لسعاد حسنى وشكرى سرحان واكيد طبعا فاكرين الشيخ اللى اتحفنا بفتاويه الحلوه اللى كلها كانت لصالح العمده حتى لو كانت بتخالف الشرع وكانت كلها تنطبق تحت مبدا( واطيعوا الله واطيعوا الرسول واولى الامر منكم ) ده طبعا على اساس انه كان بينفذ تعاليم عمده البلد اللى هو با النسبه ليه من اولى الامر ولا عجب طبعا انه فى زمانا ده يطلع علينا السيد مفتى الجمهوريه سابقا مفتى قصر الرئاسه حاليا بفتاوى لا ينطبق عليها غير نفس الكلام والمبررات اللى كان بيقولها السيد شيخ الفيلم( واطيعوا الله واطيعوا الرسول واولى الامر منكم ) الغريبه ان السيد مفتى الرئاسه حاليا مفتى الديار المصريه سابقا عمرنا ما سمعنه اى فتوى من فضيلته فى قضايا المبيدات المسرطنه ولا حوادث القطارات ولا الانتخابات النزيهه ولا حتى فى موضوع العباره السلام ويا سلام سلم طلع علينا وبدع وابدع وقال عن شويه الشباب اللى تعب وذاكر واجتهد فى بلد لا مكان لمجتهد فيها غير نواصى الشوارع والقهاوى ومبدا شيشه لكل شاب مصرى شباب ضاق بيهم الحال وزهقوا من حاله البطاله وقرروا يشوفى مستقبلهم فى بلد تانيه ولانهم مش رجال اعمال ولا هما قد تذاكر السياحه قرروا السفر با الطريق الغير شرعيه من وجهه نظر الحكومه ومع انها طرق فيها نسبه مخاطره بس للاسف المخاطر اهون كتير من حياه بلا هدف فى بلد تفنن القائمون عليه على احباط الشعب وخصوصا شبابه يقوم السيد الفصيح يقول على شباب زى ده بعد ما كان البحر ارحم بيه من حضرات الساده افاضل حزب بلدنا بتتقدم ليهم وبتبعد عنينا يقوم فضيلته يقول عليهم طماعين وجشعين باماره ايه وليه ندخل مجموعه شباب فى سباق التقرب الى قصر الرئاسه الداير بين فضيلته وبين شيخ الازهر اللى كان خابطنا فتوى قبلها بتاعه جلد الصحفيين او زى ما قال مروجى الاشاعات
الشباب المصرى غرق فى مصر قبل ما يغرق على سواحل اوروبا الشباب ده مات قهرا قبل ما يموت غرقا
السيد مفتى الرئاسه حاليا لا نرجوا منك الا ان ترجع مفتى الديار المصريه وان كنت مصر على مواقفك فلتقل خيرا او لتصمت

تاج مستر جمال

2007-10-21T10:25:00.000-07:00

واخيرا خلص التاج تاج مستر جمال ومع انى ليا عتاب عن الاصدقاء المدونين اللى ما شاركوش بس ملحوقه اللى يحب يشارك ولو بسؤال انا تحت امره وهيتم تعديل التاج والزج بسؤاله فى التاج وبا النسه للى شارك انا بشكره جدا بس فاضل خطوه يا شباب وهى انتشار التاج بينا يعنى نشر التاج بكل اسالته فى جميع مدوناتنا ومدونات الاهل والاصحاب علشان نحس اننا عملنا حاجه ويمك نلاقى اجابه للاساله على العموم ده ايميلى للى يحب ينشر التاج عنده (ataer_love@hotmail.com) اوك شباب مستنى تفاعلكم ودلوقتى مع اساله التاج وهى للعلم على حسب ترتيب المشاركه

1- عليوه
1- ليه حضرتك مش بتتعظ من السيد والدك اللى بقاله فى سده الحكم ماشاء الله ماشاء الله 27 سنه ولسه بيسد فيها وكل السنين دى تعب وشقى فى بلد اهلها لا بيحمدوا ولا بيشكرا ربنا على النعمه اللى هما فيها وتسيبك بقه من البد وتفارقها
2- حضرتك انا سافرت وتعبت وشقيت ولما جيت اتجوز ما عرفتش اعمل فرحى سعادتك فى نادى ولا حتى مركز شباب الحبانيه وحضرتك تعبت برضو وسافرت واتغربت وشقيت وعملت فرح حضرتك فى بلد بحالها اسمها على ما اذكر شرم الشيخ هو الفرح ده كان على حساب مين ولا كانت جمعيه وحاسبت المطربين والناس بعد ما لميت فلوس النقطه وبعت الدهب
حضرتك احنا شباب زى بعضينا طبعا مع حفظ المقامات انا اخرى اتمسك فى لجنه وحضرتك صاحب لجنه سياسات 3- بحالها سيادتك لو سالت اى شاب فى مصر هتلاقيه مخنوق من البلد والعيشه واللى عايشينها وعاوز يهج من البلد ليه حضرتك مرتاح اوى كده فيها ويا ترى ده حب ليها ولا حب للى فيها
2- محمد صبحى
1- هو حضرتك بتفطر ايه فى رمضان
3- نانى يا حلاوه يا عيال
1-متى سيتم اعلان المملكه المصريه المباركيه على وزن العربيه السعوديه
2- هل سيكون ولى العهد الشقيق او الابن الاكبر وما تبعيات هذا على الدستور
3- وهل سيتم تسمية الجليله الفاضله سوزان با الملكه الام
4- هدى عبد القادر بدال ما نطق يا ولا يالانضحك
1- هو سعادتك بتفكر فينا وانت داخل السرير با الليل وتفضل تسرح فى السقف زى الحبييب ما بيفكر فى حبيبه
2- لو جاوبت بنعم ممكن تقولى بيجيللك نوم ازاى ولا مؤاخذه واذا كنت مش بتفكر فينا ممكن اكون وقحه واساللك ليه يا ادلعدى
3- سؤال تانى وحيات اللى هيشفع فيك يا شيخ مش بنصعب عليك
5- نونا مش قادره
1- ليه حضرتك ما بتنزلش الشارع فجاءه وتشوف الشوارع النظيفه والمصالح بتاعة البنى ادمين اللى واقفه
2- ليه ما بتنزلش اى مصلحه حكوميه فجاءه برضو وتشوف الماسى
3- وليه لما بتروح مكان طبعا بيكون مع الاتفاق المسبق الشارع بيقف ومصالح الناس بتقف كمان
6- زوزو ZOZO
1- وانت بتلعب كوره فى دوره حورس الرماضانيه المشجعين الكتير اوى دول ناس زينا ولا امن اخوانا البعدا اسف اخوانا الحلوين امن الدوله
2-انت عمر سيادتك نزلت الاماكن الشعبيه البلدى دى (امبابه - المطريه - بولاق )دول امثله ومشيت وسط الناس من غير حراسه
3-انت كنت بتلعب مع مين وانت صغير يعنى كان ليك صحاب بتروح ليهم ويجوللك وكنت بتروح بحراسه وماما وبابا كانوا بيسيبوك لوحدك
7- غمض عينيك
1- هو حضرتك خط ولا كرت
8- واد غلبان دعونا نلعب فى صمت
1- سؤال مستر بريزدنت كم مرتب رئيس الجمهوريه بدون ذكر الحوافز وخلافه
9- L.G
1-لو لم يكن انت الرئيس فمن ترشح بدلا عنك
10- رئيس جمهوريه نفسى
1- ايه اللى اخر الجواز بتاع سيادتك (1- كنت بتكون نفسك 2- مكنتش لاقى شقه ايجار جديد 3-مستنى جواب التعيين 4-كنت بتخلص الجيش 4- مجله امريكيه نشرت ان ثروه معاليك تقارب ال100 مليون دولار ممكن اعرف مصدرها مثلا 1-دخلت جمعيه قبضتها الاول 2- حوشت من مصروفك 3- ده حاصل تحوييش العيديات طول سنين عمرك - ) ) -

11-عاليا حليم

1- امتى حضرتك هترشح نفسك فى انتخابات الرئاسه علشان نروح نقول نعم

12-صالح سعيد
1-يرضيك يا استاذ جمال الحاله اللى وصلت مصر ليها يرضيك اننا نوصل للمرحله دى من الذل والهوان والفقر والجوع وتدهور الاقتصاد الداخلى والخارجى والباطنى كمان
2-يا استاذ جمال احنا مصريين الجنسيه لكن صوماليين النوعيه نسبه الى الجوع المتفشى فى وطننا المغلوب على امره
3- اوعى تصدق كلام لجنه السياسات لان مفيش واحد فيهم جرب انه يكون عيان ومش قادر يتعالج على حسابه ولا حتى على حساب الدوله محدش فيهم جاع يوم ولو حصل هتلاقيه عامل رجيم اجبارى مش بمزاجنا

انتع سؤال للسيد جمال

2007-10-01T04:36:00.000-07:00

كلنا شايفين التاج اللى فوق راس السيد الرئيس المنتخب غصب عننا وكلنا برضوا عارفين ان التاج ده هيتم نقله من فوق الراس الجامده دى لراس السيد الوريث المنتظر برضو غصب عننا وانا من هذا المزنق فكرت وقولت ابعت تاج من بتوع المدونين للسيد الوريث بس لقيت نفسى مش قد المسؤوليه دى لانه بدال الفكره فكره تدوينيه من الاساس يبقى لازم يشارك فيها كل المدونين وعلشان كده بعرض عليكم الفكره وهيا كا الاتى كل واحد هيقرا البوست ده هيتنع السؤال اللى نفسه يساله للسيد جمال كل واحد يسال سؤال اتنين براحته بعيدا عن الاساله بتاعه امن الدوله اللى بتكون مترتبه قبل اى لقاء للوريث والهدف فى الاخر من كل ده اخراج تاج جامد نقوم بنشره فى المدونات المشاركه واللى ما شاركتش نحاول نوصل التاج ده يمكن يجى اليوم اللى السيد جمال يقدر يجاوبعليه ربنا يدينا ويديكوا طوله العمرملحوظه كل واحد يسال براحته والعالم يعلم الغايب عاوزين التاج ده يتنشر عسى ان يكون له صدى فى ودن الوريث وان شاء الله هحاول اخراج التاج با اجمل صوره لانه مش هيعبر عنى لوحدى ده هيعبر عننا كلنا كمدونين التاج هيكون رساله مننا لرئيس مصر القادم(ده لما يشوف حلمه ودنه ان شاء الله) عاوز الاساله تنزل زى المطره عليا عاوز اساله تعبر عن الناس عن اهلى واهلكم عن الشعب اساله فى حب مصر ودة مش معناه انها تكون اساله ما فيهاش نوع المرح اللى بيكون فى تاج المدونين بس عاوزها اساله تعبر عن قلب مصر اللى السيد الوريث لا عرفه ولا هيعرفه واحتمال كبير انه ما عندهوش النيه انه يعرفه اوك يا جماعه ده وقت الاساله وان شاء الله خلال السبوعين الجايين هكون ظبط التاج انا عارف ان بعضكم هيعترض لاننا هنكون بنقدم تاج يعنى بنتوجه مللك بس مش المهم كلمه تاج قد ما المهم ما يعبر عنه التاج اوك يا جماعه نبدا على بركه الله نبدا الاساله ومحدش يقولى مش محضر حاجه دلوقتى اوك

حوار مع شوشو

2007-09-15T07:16:00.000-07:00

مع المدعو شوشو
انا ايه يا شوشو ماللك ايه اللى عامل فيك كده
شوشو رمضان بقه كل سنه وانت طيب يا علوه
انا شكللك مش واخد راحتك انت فى الحبسه دى ولا عارف توسوس ولا توقع الناس فى بعضيها مش متظبط يا نجم
شوشو معلش يا سيدى اهو شهر نستحملوه با الطول ولا با العرض اهو منه راحه واستجمام واسترجاع نشاط
انا ايه بس اللى جاب سيره الترجيع والقرف ده بس تصدق يا شوش انت طلعت صايع بجد كنت عارف انك هتتسلسل علشان كده ظبط ليك اتباع بره السجن تعمل اللى انت مش قادر تعمله وانت فى السجن
شوشو عملوا ايه فرحنى اشجينى ايوه كده خلى الواحد يسمع خبر كويس من ساعه ما اتسجنت وكلها اخبار مزفته اشى دة قرر يصوم السنه دى وده خلاص هيصلى وده تاب اخبار مهببه
انا يعنى انت مش عارف وبتتلائم عليا زى عوايدك يا شوش
شوشو لا وحياه ما انت مظبطنى وساعات بضحك عليك ومش بتصلى وكتير بخليك تعاكس بنات الناس وحيات كل سيئاتك اللى انا كنت السبب فيها ما عارف انت بتتكلم عن ايه
انا يعنى انت ما تعرفش موضوع المحاكمه بتاعه ابراهيم عيسى وعادل حموده ووائل الابراشى وعبد الحليم قنديل واللى حصل فيها
شوشو اعرف عن المحاكمه بس ما اعرفش عن الحكم حاجه ايه هو اتحكم عليهم خلاص قول فرحنى انا كنت خايف لايكون بعدى عن النظام الحاكم يكون حنن قلبه وبدا يفهم ويستوعب وكنت خايف اوى لايكون بدا يحس دى تبقى مصيبه ما بعدها مصيبه بس كده اطمنت انى سايب ورايا شياطين رجاله
انا شياطين ايه يا عم دول شكلهم هيطلعوا اجدع من استاذهم اللى هو حضرتك ده الحكم صدر فى كام يوم وبسرعه البرق وبطريقه اهيف من الهيافه
شوشو يستاهلو حد قالهم يطاولوا على الرئيس المنتخب وابنه وكمان يجيبوا سيره صحته الغاليه على كل مواطن فى البلد
انا ايه يا ابو ابليس حيللك حيللك انت هتكدب الكدبه وتصدقها ولا ايه رئيس منتخب ايه يا عمنا هو انت مش حضرتك مهندس عمليات التزوير ولا ايه ولا شكللك كبرت والمشاوير دى اتعملت من ورا ظهرك وبعدين هو حد جاب سيره صحه سيادته بحاجه بطاله الناس كان نفسها تتطمن وبتسال
شوشو من ورا ظهرى ايه يا علوه حاسب ده انا بنفسى كنت بمضى الورق المزور بنفسى وبشمع الصناديق با ايدى دى اللى هياكلها الدود وهقوللك على حاجه مش هتصدقها انا بنفسى كنت بفرز الاصوات وبغير فيها على مزاجى وبعدين تعالى هنا قولى مين كان قال لابراهيم ووائل وعادل وعبدالحليم يحبوا البلد دى وهما مالهم بديمقراطيه ولا صحه ولا مواصلات ولا بيئه ولا ناس مالهم هما ما يسيبوا البلد للى عارفين مصلحتها
انا ومين بقه اللى عارفين مصلحتها يا شوش قول منكم نستفيد يا معلم
شوشو خد عندك السيد الرئيس المنتخب با العند فيكم ولى عهد المملكه قصدى الجمهوريه زى ما بتحبوا تقولوا جمال مبارك والسيد احمد باشا عز وجميع الاهل والاصدقاء با الحزب الوطنى الشقيق والساده رجال الاعمال بتوع الحزب والساده رؤساء تحرير الصحف القوميه الحكوميه والساده الوزراء والسيد الممثل خالد صالح فى عماره يعقوبيان كل دول ولوعاوز كمان اقوللك مش تقولى عبدا الحليم وابراهيم ووائل وعادل ناقص كمان تقولى هيكل وايمن نور وطلعت السادات وهشام البسطويسى ومحمد سعد فى اللى بالى باللك وروسية الشعب
انا شكللك خلاص السجن اسر على عيونك الدبلى يا معلم وما بقيتش تشوف خالص وكمان بقيت تنسى عاوز تعد اللى بيحبوا البلد عد شهداء راحوا فدا ترابها عد المعتقلين فى معتقلاتها عد المنفيين بره حدودها عد الناس الغلابه عد واوعاك توقف عد لانها دايما بتطرح وتولد ولاد بتحبها اكتر بكتير اوى من اللى بيكرهها
شوشو ايه يا علوه انت جاى تنغص عليا سجنى ولا ايه خلاص يا معلم عرفنا بس انا راجع وهرجع اقوى من الاول طمن احبابى وخوف اعدائى قولهم انى راجع
انا ماشى يا معلم هبلغهم رسالتك ويمكن ترجع تلاقى الحال اتغير والحاكم بقى محكوم والظالم سيف العدل طاله فى يوم (فما بين غمضه عين وانفراجتها يغير الله من حال الى حال )سلام يا ابوالشياطين وليا كلام تانى معاك هنقلب فى القديم يمكن نستفيد من التجارب القديمه سلام يا عاشق الظلمه

الجماهيرية العربية الليبية الشعبية الاشتراكية العظمى

2007-09-01T04:16:00.001-07:00

الجماهيرية العربية الليبية الشعبية الاشتراكية العظمى هو دة اسم البلد اللى كل واحد من شباب البلد هنا سافر ليها علشان لقمة العيش ولانة اتخنق من البلد هنا ونظامها وخنقتة وقعدتة فى البيت وزهقة من شرب الشيشة والسجاير وقال اسافر اتغرب اشوف ناس تانية واشتغل واحوش ويمكن كمان افكر اتجوز وبما ان ليبيا هيا البلد اللى فاضل للمصرين لانها لا بتطلب عقد عمل ولا اى حاجة من دى وكل مشوار السفر ليها بيتكلف حوالى 120 جنية وبس كانت هيا ملاذ ملاين من شباب بلدنا وانا كنت واحد منهم وبعترف انى فى ليبيا اتحملت اللى عمرى ما كنت اقبل اتحملة فى بلدى عملا با المثل الى بيقول البلد اللى ما حدش يعرفك فيها لاخر المثل واللى سافر ليبيا من اول مرة يقابل فيها الحدود الليبية وبعد ما يبهر عينية بمشهد الهضبة المصرية الجميل خصوصا با الليل ودة بيكون اخر مشهد مصرى اصيل قبل ما يشوف بقى الجمرك المصرى ويقف فى طابور الجوازات ويشوف لاول مرة فى حياتة ظابط من بتوع الجوازات بعيونة المتفحصة المتمحصة وهو بيلزق الختم على جواز السفر ويدية لامين شرطة او نقيب اللى يقوم بدورة على الكمبيوتر ويشوف نظام صاحب الجواز سواء كان فل ولا هارب من شىء ما وتنتهى هنا الاراضى المصرية وعلى فكرة الشعور الوحيد اللى بيكون مع الواحد فى اللحظة دى انة مش عاوز يشوف شكل بلدنا تانى او يمكن دة كان شعورى لوحدى وقتها وهنا تبدا المرحلة التانية الجمرك الليبى وهناك هتدهشك معاملة الليبيين لانك هتشوف وهتسمع اللى عمرك ما شوفتة ومش هتقدر تغمض عينيك ولا تسد ودانك ولا حتى تفتح بق حضرتك لانك للاسف قبل ما تدخل الاراضى الليبية ودى نصيحة من سافرو ا فبل منى ومنك انك تحط الشىء الغريب اللى اسمة الكرامة دة على جنب قبل ما تدخل الاراضى الليبية الشقيقة دة اساسيا لو كان فاضللك شىء اسمة كرامة فى بلدك وفى الجمرك الليبى ومن الاشقاء الليبيين مع احترامى الكامل لمفهوم كلمة شقيق يقابللك الاشقاء الليبين بوابل من الشتيمة من كل نوع بس طبعا با الليبى ودة مش خوف منك لا طبعا دة لانهم مش بيحبوا لا يتكلموا مصرى ولا بيحبوا مصر من اساسة ولو جة فى بال سيادتك تعملى فيها مناضل وتتكلم وترد هتلاقى الاقدمين اللى هما قداما المسافرين يقولوللك يا عم اسكت هتودينا فى داهية ومش هنشوف مصر تانى تطر تسكت لانك من اللحظة دى بدات تحس ان حتى وانت فى مصر وقرفان وزهقان وبتششتم برضوا وتتهان على الاقل بيحصللك كدة من مصرى برضو وبكدة تكون انتهت فى الجمرك الليبى علاقتك الوطيدة بمفهوم الكرامة وانتهى ما كان يسمى كلمة كرامتى وكبريائى وتم دفنهم فى ارض الجمرك الليبى تبدا مشوارك الابدى من احلام انك تلاقى شغل وتعدى وتوصل لمرحلة التحوييش ويا سلام لو وصلت لمرحلة تغيير الدينار الليبى لمعشوق الجيوب عمنا وعم الكل الدولار بس علشان توصل لكدة هتشوف اهانات غير عادية هتتغير خالص مبادئك دة لوكان ليك مبادىء هتتلخص حياتك هناك فى انك تروح الشغل كل يوم الصبح دة لو لقيت شغل كل يوم والهروب من العساكر الليبين دة بقة كل يوم علشان ما تتحكش بيهم لاى سبب ولانهم من غير سبب ممكن يستبيحوا كل حتة فى جسمك من غير هدف محدد غير انهم يعلنوا انتصارهم عليك كمصرى من ارض النيل وكل يوم هتحلم با اليوم اللى ترجع فية للجمرك المصرى مرورا با الجمرك الليبيى وانت خارج منة تطلع كرامتك اللى دفنتها تحت الارض لانك مش هتعرف ترجع من غيرها لمصر بس فى ليبيا هتلاقى اضطهاد غريب من معظم الشباب الليبى لشخصك اولا وبعد كدة لمصر كرة غريب لكل شىء مصرى لية ما تعرفش ولاتفهمش ومن الاسباب المعلنة اننا كمصريين رايحين نشحتوا منهم ودة طبعا فية شىء قليل جدا من الصحة لان فى مصريين كتير شغلتهم هناك الشحاتة بس ما بيشحتوش غير من المصريين اللى زيهم وقليلا جدا لو شحتوا من ليبي وتلاقى الليبى من دول لو جالة برد ينزل مصر يتعالج وعندهم مفهوم غريب عن بنات مصر الواحد منهم حاسس انة لما هينزل مصر هيعمل علاقة مع كل بنات مصر وحريمها لان من وجهة نظرهم بنات بلدنا كلهم ............. ما علينا ومع انة مصر زى كل حتة فيها الوحش وفيها الحلو الا انهم شايفينا كلنا وحشين وكلنا على رايهم وبا الليبى موسخين بس موسخين اية وهنوسخ مين وفى ليبيا زى كل الدول العربية والخليج بيحبوا جدا الكلام فى الدين والتدين والصلاة والشيخ فلان قال والشيخ علان قال وقليل منهم اللى بيعمل با الكلام دة فى ليبيا بيوت دعارة زى كل حتة فنادق مجهزة جدا بكل شىء حتى بنات الليل ومن كل الجنسيات وكل دة تحت سمع وشوف الشرطة الليبية اللى لو مسكت مصرى واحد فى الشارع وما كانش معاة جواز سفر او حتى كان معاة جواز سفر هتبهدلة وهيسمع شتيمة لية ولاهلة ولبلدة من منقع الزفت زى ما بيقولوا نفس العسكرى اللى بيشتمك كدة هو نفسة اللى بيحمى بتوع الدعارة وبتوع الحشيش اللى اكتر من الهم على القلب فى ليبيا معظم اصحاب الشغل فى ليبيا بيصلوا وعارفين ربنا بس اكتر اية بيحبوا يرددوها على ودانك كمصرى وانت شغال ( بسم اللة الرحمن الرحيم وقل اعملوا فسيرى اللة عملكم ورسولة والمؤمنون صدق اللة العظيم )ودة بعا يجى بعد منة الاحاديث النبوية اللى بتتكلم عن العمل وقيمة انك تخلص فى عمللك بس من غير دخول لمناطق تانية من القران اللى بتتكلم عن حقوق العامل نفسة والاحاديث اللى بتتكلم عن حقوق الاجير او العامل وعلشان ما نحطش الليبين كلهم فى سلة واحدة فى ناس كتير وشباب كتير محترمين جدا جدا وانا عن نفسى صاحبت كتير منهم واشتغلت مع ناس كتير وزى ما فى فى كل حتة فى الدنيا اصحاب شغل كويسن واصحاب شغل حرامية مش فى ليبيا بس لو مثلا وقعت حضرتك وانت فى مصر فى صاحب شغل حرامى فى فرصة 60فى المية ترجع حقك با القانون با الضرب حتى بس فى ليبيا لو حظك الوحش وقعك فى صاحب شغل حرامى النسبة هنا 9من عشرة فى المية امك تاخد حقك وبرضوا با الضرب وبا القانون فى ليبيا من فترة كدة يمكن اكتر من خمس سنين كان فى عندهم قناتين فى التليفزيون ممكن تشوفهم الاولى قناة ليبية بمعنى الكلمة ليبية صرف التانية كانت قناة بتعمل بث لبعض المسلسلات والافلام والبرامج اللى بتكون على الفضائيات وبيكون للقناة مركز بث ودة فى كل مدينة لوحدها يعنى مش لازم اللى يكون شغال فى الوقت دة فى بنغازى يكون شغال فى درنة مثلا القناة دى بيكون متحكم فيها شخص زى المخرج كدة بتاع الماتشات بمزاجة يفرجك بمزاجة على البرنامج دة على الفيلم دة براحتة وممنوع منعا باتا انك تشوف حضن او بوسة فى اى فيلم لانة بيحصل قطع على الحاجات الوحشة دى ودى كانت حاجة بتحرق دمنا جدا بما اننا بنبقى نفسنا نشوف حاجة طرية والقناة دى اتشالت والسبب كان برنامج سى بى ام اللى كان بيجى وقتها على قناة الام بى سى لانهم فى القناة ومش عارف دة حصل ازاى وكيف سابوا البرنامج دة شغال وكانت الحلقة عن السيد العقيد معمر القذافى وكانت فى الحلقة تريقة على سيادتة فطبعا كان لازم تنتهى القناة واللة اعلم المشرف او المخرج دة راح فين وتلاقى كل دة بسبب دعواتنا علية فى كل بوسة او حضن او فستان من غير هدوم كان بيقطع عليهم اما با النسبة للسيد العقيد معمر القذافى فدة كلنا طبعا عارفيبنة من لقاءاتنا معاة عبر شاشات التليفزيون والفضائيات فى القمم العربية اثناء القاءة لاى خطاب من خطاباتة اللى ما لهاش حل وبتقدم حلول لكل حاجة حتى المشكلة العويصة بتاعة فلسطين واسرائيل حلها الراجل الاخ العقيد فى فى كتاب نشرة اسمة الكتاب الابيض ودة غير كتابة التانى اللى يعتبر هو دستور ليبيا اللى اسمة الكتاب الاخضر حد يسالنى طيب اية الحل اللى الاخ العقيد قالة فى الكتاب الابيض الحل بسيط ومش عارف ازاى ما خطرش على بال حد فينا ودة طبعا لانة محتاج عبقرى زى الاخ العقيد والحل فى كلمة واحدة ان فلسطين تبقى (اسراطين) ازاى ان الاسرائليين والفلسطينيين يبقوا ايد واحدة وبلد واحدة حل زى الفل وننسى بقة الشهداء ودموع الامهات والبهبهات كمان ونسى مجازر غزة وجنين وكل نقطة دم راحت علشان فلسطين والفلسطينى يقابل الاسرائيلى با الاحضان با الاحضانواللى مش عاجبة يضرب دماغة فى اى سور حديقة فكروا فى الحل دة وابقوا قابلونى لو نفعتوا ولا نفع الحل دة وفى نهاية كلامى احب اقول حاجة انى عملت احلى فلوس من ليبيا وخدت منها كتير بس اديتها اكتر شغل وتعب زيى زى كل المصريين وزى ما بيقولوا ان اللى بنى مصر كان فى الاصل حلوانى اللى بنى وعمر ليبيا كان فى الاصل مصراوى ويا ريتة عاجب

2007-08-22T06:23:00.000-07:00

لا للتعذيب ولا للسكوت على التعذيب وعلى راى عمنا صلاح جاهين
انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!!

جايللك يا ابو صلاح

2007-08-21T06:57:00.000-07:00

على رايح فين يا ابو صلاح يا صلح استنى بس هكمللك دة احنا كمان اديناهم بترول وقولنالهم معلومات عن اخوانا با العراق استنى بس يا صلح هتعمل ايه استنى ما ترميش نفسك صلاح يا ايوبى رايح فين انت زعلت من ايه بس استنى انا مش بعرف اعوم وهكذا وبعد كل ما سمعة عن احوالنا وعرف انه مفيش فايده رمى نفسه فى بحيره طبرية وانا للة وانا اليه راجعون انا رايح اشوى السمك بقه سلام ويدوب بلف
????? استنى رايح فين هو دخول الحمام زى خروجه
على حضرتك مين وعاوز ايه
؟؟؟؟؟؟؟؟ هتعرف كمان شوية هاتوه
وفجاءه يهجم عليا اتنين طول بعرض با ارتفاع ويرمونى فى البوكس
على فى ايه انا عملت ايه واخدينى على فين
؟؟؟؟ انت فاكر ان البلد ما فيهاش حكومة شايفة وعارفة كل حاجة قتلت الراجل ليه
على راجل مين يا باشا دة كله كلام فى كلام خيال يعنى
؟؟؟؟؟؟ وكمان بتستهبل هتعمل مجنون هنشوف لما نوصل هتفضل مجنون لحد امتى يا عليوه
على طيب احنا رايحين على فين
؟؟؟؟؟ هتعرف لما نوصل
بعد شويه ولما وصلنا عرفت انى فى قسم شرطه بس شرطه اية مش عارف
الباشا ها هتقول قتلته ليه ولا هتتعبنا معاك
على ياباشا ده كلة خيال كلام وبس
الباشا يشاور لاتنين مخبرين رجعولة عقله شكله هيتعبنا
ومع اول قلم ومن اول ركلة رجل ومن اول شلوت وقبل ما توصلنى خطافية من المخبر الشديد اللى فيهم
على خلاص يا باشا هعترف انا اللى قتلت صلاح الدين الايوبى ولو عاوزنى اعترف انى انا اللى غرقت العبارة وانى انا اللى حرقت القطر وسرطنت المبيدات وبا النسبة لثورة 19 انا اللى قتلت ال19 دول اعترف باى حاجة
الباشا ايوة كدة ما كان من الاول لازم يعنى تخلينا نتعب ايدينا ورجلينا معاك
على معلش يا باشا قله عقل ربنا يزود النجوم فوق الظبلايط على كتافك وتاخد سيفين يقطعوك قصدى سيفين ونسر وتبقى لواء قد الدنيا
الباشا خلاص يا روح امك انت هتصاحبنى ها بقى بهدوء كدة ومن غير كلام كتير قولى على اعضاء التنظيم اللى انت واحد منة
على تنظيم اية يا باشا مكانش فى حد فى الخيال معايا غير صلاح الدين ومات اللة يخرب بيت البانجو وسنينة
الباشا ولا ها اخليهم يفكروك شكللك بتستهبل طرخخخخخخخخخخ
قلم ظباطى ما لهوش اخ خلانى فى ال\باى باى
على خلاص يا باشا هعترف اللة يخربت الدستور واللى عملته فيا
الباشا بتبرطم بتقول اية يا روح اهللك
على ولاحاجة يا باشا ولا حاجه
الباشا ها مين بقة الرئيس
على الرئيس هو فى حد ما يعرفش الريس ده حتى دايما فى بالنا وفى خيالنا ده انا حتى انا كان نفسى احلم بية زى ما حصل فى صلاح الدين فى اخر الحلم
الباشا مش الريس دة يا عم الخيال انا بسال عن رئيس التنظيم بتاعك ها اخليهم يفكروك
على لا يا باشا خلاص فهمتك سامحنى يا رب رئيس التنظيم يا باشا هو ابراهيم عيسى ودة بقة بيقول كلام عن الريس والحكومة انتو سايبينة لية يا باشا ده مبهدلكم وبا النسبة لامير الجماعة علشان ما تتعبش نفسك وتسال هو بلال فضل ده مصيبة يفضل يسخر منكم وسخريتة لذيذه وكلامه جميل بس انا مش معاة فى كلامة انا بقراة وبحسة وافهمه بس سا محنى يا هيما انت وبلبل
الباشا حلو اوى كدة كمل يا روح اللى جابتك احكى عن باقى التنظيم اشجينى سمعنى سمعت الرعد
على بصوت واطى رعد يبوظ ودانك وبرق ياخد اجللك
الباشا سمعنى يا ابن ؟؟؟؟؟؟ بتقول ايه

على ولا حاجة يا باشا بدعيللك ربنا يعلى مراتبك الفين مرتبة وتبقى انت تحت منهم هقوللك يا باشا احنا وصلنا لحد امير التنظيم با النسبة بقه يا باشا قائد الجناح العسكرى فده اسمه خالد كساب ومعاة ناس فى الجناح ومسمين نفسهم ضربة شمس ودول بقة اللى بيسخنوا الناس يا باشا على الناس المحترمة اللى زى حالاتك وخالد دة يا باشا عامل نفسة ريس والكل بيقولة يا ريس ومعاة بقة حنان الجوهرى ومحمد الدسوقى ومى سمير واميرة حسن وهشام هلال وشادى زلط ودعاء عادل وفى حتة لبنانى كمان تنظيم دولى وفى بقة دراع خالد اليمين اخوة وليد كساب اكمللك يا باشا دة فى ناس بتبعتلهم وما تقولش لخالد غير يا ريس منهم هيما كول وبانجو اسمة لوحدة قضية
الباشا لا مش مهم هنجيبهم كلهم على مهلنا كمل كمل عاملين بلد جوة البلد فاكرينها بتاعتكو لا دى بتاعتنا احنا اللى بتعب ونسهر علشانكوا ولا انت عندك راى تانى
على هو فى راى بعد رايك دة انت بتقول ضرر يا باشا ربنا ما يحرمك ويطعمك وبصوت واطى واشوفك كدة مولع فى نار جهنم اكمللك يا باشا با النسبة للعضاء الجدد فدول يا سيدى مسؤول عنهم هشام عبية هو المسؤول عن انتشار التنظيم وفيهم اعضاء كتير دايما بشوفهم هناك منهم على سبيل المثال مش الحصر مروة جمعة وصالح سعيدوعمرو عبداللة عبد الرحمن ود اسماء عبد العاطى وهبه سعيد ومحمد فوزى ورحاب صالح وهدى عبد القادر وغيرهم كتير
الباشا حلو اوى كمل ده انتو هتشوفوا ايام سودة انت شيوعى يا ض
على لا يا باشا استغفر اللة شعوعى اية انا مسلم ولا بلاش مسلم احسن تقولى انى اخوان وانتو بتكرهوا الكلمة دى انا مواطن مصرى يا باشا
الباشا يعنى ايه مواطن مصرى يا خويا خدت اذن من مين علشان تبقى مواطن وكمان مصرى كمل يا ابن؟؟؟؟؟ بقيت التنظيم كمل احسن هقوم افرمك
على لا يا باشا ودى تيجى اهو يا باشا ولا تتعب نفسك انا هضرب نفسى طرخ طرخ حلو كدة يا باشا اكمللك بقة فى خلية يا باشا فى التنظيم اسمها لا فى ايدى سيف ولا تحت منى فرس بيقولوا كلام وحش فى حقكم وبيسخنوا الشعب عليكم وفى امير فى التنظيم اسمة ابراهيم منصور بيقول كلام عنكم وبيتكلم عن مصر بقة واللى بتعملوه فيها وعن الوزراء والحكومة ربنا يهدى يا باشا وفى خليه عن التعليم وخلية عن الفن والفنانين وفى خلية عن الدين اميرها ممدوح الشيخ وفى خليه عن الحاجات المرعبة اللى فى الدنيا بس مش بيجيبوا سيرة الداخلية يا باشا
الباشا يجيبوا سيرتنا ليه يا خويا شايفنا بنعض ولا بنضرب ولا بنموت ولا بنعذب
على لا يا باشا لا سمح اللة شايف اية ده كلام انا حاسس يا باشا وبعدين دة ايد سعادتك احن من ايد اقل مخبر فى الداخلية اكمللك يا باشا بقيت التنظيم فى خلية كمان يا باشا خاصة بتسلية الاعضاء بيجيبوا فيها العاب اجنبية وزى ما تكون خلاص الالعاب بتاعتنا خلصت ومنها الحجلة والكورة الشراب واحلى لعبة بقة عريس وعروسة عمرك ما لعبتها دى يا باشا مع ابن الجيران
الباشا لعبتها كتير وشكلى هلعبها معاك ولا ايه
على لا يا باشا وعلى اية دى حتى لعبة بايخه فى بقة خلية اسمها لولا اختلاف الراى بقة فيها ناس جامدة د يحيى الرخاوى ابراهيم داوود بثينه كامل د احمد يونس محمد القدوسى ومحمد احسان عبد القدوس دة بقة عاملى فيها صاحب قهوة ومعلم يعنى وحلمى النمنم واكرم السعدنى وغيرهم يا باشا وخليه رياضية علشان العقل السليم فى الجسم السليم بصوت واطى ربنا يهرى بدنك يا بعيد وغيرهم وغيرهم
الباشا وبا النسبة للمنشورات بقة بتعملوها ازاى
على شوف يا باشا فى منشورات يومية ودى بتتوزع كل يوم وفى منشور اسبوعى ودة كل يوم اربع وبيفضل لحد يوم الحد وبعد كدة بيتلم
الباشا مش عارف اقوللك اية يا ؟؟؟؟؟؟؟امك بس انت عملت احلى واجب معايا ولازم اردللك الواجب با احسن منة عارف بحيرة طبرية
على اة يا باشا ودى تتنسى اللى انا قتلت فيها صلاح الدين الايوبى ورميتة فيها وسرقت السمك كمان بس ما لحقتش اكلة فى ناس انا عارفهم بصولى فية وكلام بقه ايه اخبار السمك وكدة حقد يا باشا
الباشا انا يا علوة الواجب بتاعى اخليك تحصل صلاح الدين اية رايك تحصلة ولا تقعد معانا هنا يومين تلاتة والمخبرين هنا بتاعتنا بتحب لعبة عريس وعروسة جدا تحب تفضل معانا
على لا يا باشا ربنا ما يحرمنى من عطفك طبريه حلوه واحنا حتى فى صيف
جايللك يا ابو صلاح

زيارة من مسؤول جامد جدا

2007-08-19T09:47:00.000-07:00

زيارة من مسؤل بعد بكرة ودة يوم الاربعاء الموافق 22 من الشهر الجارى والحاضر يعلم الغايب عندنا زيارة من مسؤل حد من القراء يسالنى مين سؤال جرىء ويسعدنى انى اجاوب علية السيد المسؤول هو رئيس الوزراء احمد نظيف وزى ما احنا شايفين الشغل شغال فى البلد على قدم وساق وركبة علشان البلد هتنور زيادة على نورها با الزيارة دى اللى ما كانتش على البال ولا على الخاطر ومن هنا ومن هذا المزنق هقولكم وصف تفصيلى للزيارة من منطلق انى عارف بلدنا طبعا زى ما انتى عارفين او مش عارفين مش مهم السيد المسؤول هيفتتح كذا مشروع ومنهم سوق خضار جامد جدا وموقف سيارات ودول اللى يهمونا لانهم دول اللى جابو رجلة لداخل مش هنقول بقة زى الناس ان البلد هيوقف حالها ومحتالها وكدة لاننا مش هنوصل لكدة ودة برغم ان المشروعين واحد فى اول البلد تقريبا من ناحية والمشروع التانى من ناحية تانية والمفروض انة علشان يوصل من دة لدة انة يعدى ويغوص بكوتش عربيتة داخل شوارع بلدنا وتتم دربكة سوست عربيتة فى مطباتها وطبعا دة من تاسع المستحيلات لان المنطقة اللى المفروض يعدى من خلالها اسمها ابوالريش وعلشان تعرفو اية الصعوبة فى كدة هديكو مثل وهو سواقين التاكسيات اى سواق تشاور لسيادتة وتقولة ابو الريش يا باشا ربنا ينولهالنا يبصللك الباشا دة بقرف ويمشى من غير ما يرد وكانك قولتلة ودينى اسرائل وهو اعتبرك اسرائيلى عدو مفكرش حتى لثانية انك ممكن تكون رايح تعمل عملية استشهادية وكدة تبقو عرفتو ابور الريش ونعود لموضوعنا السيد المسؤل طريقة هيكون كا الاتى دخول من الطريق الدولى الساحلى قادما من الطريق الزراعى بعد افتتاح كوبرى كفر الدوار ومن الطريق الساحلى يتم دخولة عبر طريق الكورنيش الجديد اللى لسة حتى ما حصلشى علية اى فعل فاضح من اى شاب واى موزة لسة ما مشيش علية مليونا من المستخدمين وبعد كدة يدخل الى كوبرى فلاقة اللى هيكون مغطى با الافتات الجميلة الكبيرة المغطية لما ورائها والمهنئة لينا با الزيارة الميمونة ومحدش يفهمنى غلط ويمر طبعا بين جموع الشعب اللى هيكون بعيد كل البعد عن الموكب ما هو مش معقول نغطى كوبرى وما نبعدش الشعب وبمجرد عبورة الكوبرى يكون قرب جدا من الوصول لافتتاح السوق لان السوق مش بعيد عن الكوبرى وما اقولكمش بقى عن منظر المنطقة بعد اكتمال العمل فى السوق وتظبيطة للزيارة تم تغطية موقف السيارات القديم ونقل الباعة الجائلين اللى كان ليهم سوق واتهدم وتم نقلهم خارج حدود السوق الجديد ودلوقتى اتنقلو خارج حدود رؤية السيد المسؤل وبعد افتتحاح السوق يرجع السيد المسؤول من نفس طريق الدخول وهو ما شافش ورقة ولا عقب سيجارة مرمى فى الطريق بعد عمل الكناسين الدائم قبل الزيارة وبرجوعة من مطرح ما جة يكون خلص واتخلص من افتتاح مشروع سوق الخضار وباقى لة افتتاح الموقف ودة هيكون شىء سهل جدا وعلى مجلس المدينة والمحافظة لان المكان يعتبر خارج حدود البلد وقريب جدا من الطريق الزراعى وبعد افتتاحة هتكون كدة خلصت زيارة من اهم الزيارات فى تاريخ محافظتنا وبلدنا دمنهور والى لقاء فى زيارة اخرى ميمونة

صلاح الدين وانا

2007-08-13T06:07:00.000-07:00

رجعت با الزمن كتير لحد ما وصلت لحبيبى صلاح الدين الايوبى وكنا قاعدين على بحيرة طبرية بنصطاد سمك عادى يعنى وكان هذا الكلام

صلاح مرحبا بك يا على كيف حاللك

على الحمد للة يا ابوصلاح وانت اية اخبار الحروب والصليبيين وكدة

صلاح نحمد اللة على نعمة

على يعنى ظبط المسائل يا باشا وشرفتنا كدة

صلاح الحمد للة لقد نصرنا اللة نصرا عزيزا ونحن الان على مشارف القدس وكنت اتمنى ان تكون معنا لتحضر هذة الحرب

على واللهى مشاغل يا مان بس اوعدك لما الحكام بتوعنا تجيلهم فكرة الحرب ويقرروا يحرروا القدس هكون معهاهم ربنا يدينا ويديلك طولة العمر

صلاح وماذا يمنعهم من اتيان الحرب

على حاجات كتير يا ابو صلاح اولها الامكانيات مفيش امكانيات لا مادية ولا بشرية
صلاح ماذا تقول يا رجل كيف ذالك
على احنا اة عندنا كل حاجة بس كل حاجة فى اتجاة لوحدها يعنى كل شى ء مستقل بذاتة
صلاح كيف
على يعنى الامكانيات المادية عند كام بلد والامكانيات البشرية عند بلاد تانية والعقول كلها بتاعتنا بنصدرها للدول المعادية من باب اننا مش محتاجين عقول احسن من اللى عندنا با اختصار احنا مش شايفين بعض ولا خايفين على بعض ولا بنحب من الاساس بعض
صلاح لا حول ولا قوة الا با اللة ومن يحارب من اجل تحرير القدس
على واللهى مش عارف اقوللك اية يا ابوصلاح بس تقريبا اهل البلد اللى هما اول ناس المفروض يدافعو عنها دلوقتى بيدافعو عن نفسهم من بعضهم والدنيا هناك بقيت هيصة ما تعرفش مين بيحارب مين وعلشان مين ولا علشان اية
صلاح يعنى مبدا فرق تسد فرقو بين الاخوة علشان يقدرو عليهم
على يا سلام يا ابو صلاح هو دة الصح زى ما بيعملو فى العراق با الظبط
صلاح هو العراق ايضا تم احتلالة
على اية يا ابو صلاح انت مش عايش فى الدنيا ولا اية من زمان بعد افغانستان بشوية
صلاح بس لا تكمل كلام لقد ضاعت العرب
على اية يا ابو صلاح روق اومال لا ضاعت ولا حاجة كلة با الصبر اهدى كدة ووحد اللة اومال كدة هتضيع نفسك هو احنا عندنا كام ابو صلاح
صلاح وين الحكام والملوك والولاة العرب
على موجودين طبعا يا باشا وبيجتمعو وبيقولو احلى كلام وربنا لو سمعتهم الدموع هتنهمر همر من عينك من فرط الحماس بتاعهم ونيتهم للتحرير بس عن طريق معاهدات السلام
صلاح الحمد للة هناك اتفاقيات بينهم وبين المحتلين لالغاء احتلالهم لاراضينا العربية
على مش قوى كدة يا صلوح المعاهدات دى اذا اتنفذت طبعا احنا هنتنازل عن جزء من اراضينا للمحتلين مش خوف ولا جبن ولا لانهم اجدع مننا وبيقدرو يحافظو على اللى بيقولو انة حقهم لا احنا بنعمل كدة علشان احنا طيبين ومسالمين بس هما يرضو يعيشونا جنبهم
صلاح بتطلبو رضاهم فين حين انهم هم من الاولى يطلبون رضاكم لانها ارضكم
على لا ما اسمحش انك تقول كدة هما يطلبو لا حاشا وماشا هما يؤمرو واحنا ننفذ وبعدين ما تكبرش الموضوع يا صلح احنا كمان مش ساكتين احنا بندعى عليهم كل صلاة جمعة مش ساكتين
صلاح وبالنسبة لموضوع السلاح بتسلحو جيوشكم بنفس اسلحتهم ام لا
على شوف برضو الكلام سلاح اية يا صلح دول عندهم سلاح فتاك اسلحة نووية مش عندنا ممكن يخلصو علينا فى لحظات
صلاح وانتو لية ما عندكم مثل هذا السلاح
على لا احنا عاملين اتفاقية منع انتشار الاسلحة دى بينا لانها اسلحة محرمة علينا واحنا بنتمسك بمعاهداتنا حتى لو فيها ضياعنا
صلاح على الاقل لا تشترو منهم ولا تبيعو ا لهم ولا يتم التعامل بينكم ابدا حتى ينتهى هذا الاحتلال
على لا الحكام بتوعنا فى الاول كانو بيبيعو ويشتروا منهم بس من غير ما يقولو كانو مخبيين دلوقتى الموضوع بقى عادى وبنعمل اتفاقيات معاهم تلزمنا اننا نشترى منهم ونبيع عادى كاننا اصحاب بس يعنى واخدين على خاطرنا من بعض ومصارين البطن بتتخانق يا صلح
صلاح دة كدة انتو اكتر من الاخوات يا علوش
على شكللك مش مصدق اننا اكتر من اخوات هقوللك على حاجة هخليك تصدق ايام الحرب على دولة العراق العربية الشقيقة احنا فى مصر كنا فاتحين قناة السويس للسفن الحربية بتاعتهم علشان تعدى وتروح تضرب وكان فى قواعد عسكرية للمحتلين فى معظم الدول العربية الشقيقة المجاورة يعنى تقدر تقول اننا عملنا معاهم اللى ما بنعملهوش مع اهلنا اخوا اخوات يعنى
صلاح استودعكم اللة يا على
على رايح فين يا ابو صلاح يا صلح استنى بس هكمللك دة احنا كمان اديناهم بترول وقولنالهم معلومات عن اخوانا با العراق استنى بس يا صلح هتعمل اية استنى ما ترميش نفسك صلاح يا ايوبى رايح فين انت زعلت من اية بس استنى انا مش بعرف اعوم
وهكذا وبعد كل ما سمعة عن احوالنا وعرف انة مفيش فايدة رمى نفسة فى بحيرة طبرية وانا للة وانا الية راجعون
انا رايح اشوى السمك بقة سلام

الى محمد حجازى الشهير ب(بيشوى)

2007-08-11T07:33:00.003-07:00

انا هقول رايى المتواضع فى الكلام الى قولتة سيادتك فى جريدة الدستور اولا يا سيدى علشان تبقى عارف الدين الاسلامى الى هو الاسلام هو مكمل لكل الديانات واذا كنت حضرتك ما فهمتش الاسلام صح دى مشكلتك انت مش مشكلة الدين الاسلامى وحكاية انك عندك عقل وبتفكر وانك انسان مفكر كل دة هرتلة فاضية ويمكن هيا اللى وصلتك لكدة وحكايت انك درست فى معهد عمر ابن الخطاب للدراسات الاسلامية للاسف انت ما خدتش من المعهد ولا من سيدنا عمر غير انك عملت زية واشهرت مسيحيتك مع انة هو اشهر اسلامة ومع الفرق الكبير طبعا لانك عمرك ما هتكون الفاروق بتاع المسيحيين انت للاسف عقللك ونفسك ضحكو عليك والنفس امارة با السوء وبعدين سيدنا عيسى اية اللى طلعللك فى المنام انت كنت نايم من غير غطا ولا اية اللى طلعللك ما هو الا شيطانك وزى ما قال نبينا وخاتم الانبياء سيدنا محمد علية افضل صلاة وتسليم انة هو الوحيد اللى لو شوفناة فى المنام يبقى شوفناة على حق واى حد تانى يبقى الشيطان وبعدين اية اللى انك تعمقت فى دراسة الكتاب المقدس با اجتهادات شخصية انت لحقت كمان تبقى مفتى مسيحى وانك شاعر وعندك ديوان احب اقوللك ان مش كل من ركب الحصان خيال ولازم تعرف اننا فى الاسلام بنؤمن بكل الانبياء والمرسلين ومنهم سيدنا عيسى علية السلام وزى ما بيقولو محمد نبى عيسى نبى موسى نبى وكل من لة نبى يصلى علية انت عملت زى الدبة اللى قتلت صاحبها بس انت ضيعت نفسك بغرورك وتفكيرك الغلط افتكرت انك بتعرف تفكر بس للاسف تفكيرك خانك انا اعرف ان الشيطان زى ما بيقولو صايع وشاطر بس انة يطلع شاطر كدة لا دة حتى الشيطان اتطور وبقى اذكى من الاول ايام ما كان اخرة يخلى الواحد يهيس ويعمل حاجات كنت فاكرها غلط جامد دلوقتى اى مصيبة اهون بكتير من اللى عملة فيك هختم واقوللك اية بس انت عديت كل حدود المنطق ومع ان مسيحيتك لن تنقص من الاسلام اى حاجة بس صدق او ما تصدقش محدش هيضر من الموضوع دة غيرك انت بصراحة يا بيشوى حلو بيشوى هقوللك وانا اسف جدا انى بقول كدة انت الشيطان ؟؟؟؟؟؟؟؟ (ضحك عليك)وسلم على كرستين خليها تنفعك سلام يا مفكر

يا ريتنى ما اتفرجت على ميلودى

2007-08-11T07:33:00.002-07:00

النهاردة قولت ارطب عينية واسمعلى اغنيتين على اى قناة اغانى اهو نشوف حاجة طرية وجات الاغنية المناسبة للموقف وكانت على قناة ميلودى ولما كانت الاغنية خلاص هتخلص والموزة اللى بتغنى قصدى الفنانة خلاص بتنهى الفقرة بتاعة العرض بشوية دلع وفرفشة نزلت لتحت بنظرى طبعا مش على رجلين الموزة لا راحش للشريط اللى تحت اللى بيكون علية الرسايل وكانت مفاجاءة ورسالة حب عميقة من موزة برضو دة فرضيا يعنى قالت فيها انا بحب تامر حسنى جدا جدا لانة حلو وقمر وراجل بمعنى الكلمة مش عارف لية الكلام دة حز فى نفسيتى جدا مش لانها قالت انة حلو ولا لانة قمر لا سمح اللة لان دى حاجة واضحة جدا للعين المجردة من كل حاجة بس هو موضوع الرجولة نفسة خلانى افتكرت الحكم الى حكمتة المحكمة الجنائية علية لما القاضى قالها مدوية وبصراحة انة تم الحكم بسنة والناس بدات تصرخ ونص موزز مصر بدا يجيلة انهيار فى مشاعرة المرهفة بحب تامر وزى ما يكون القاضى حس رجع قال مع وقف التنفيذ مع وقف التنفيذ لية دة الراجل اوى دة على راى صاحبة الرسالة زور قال اية وقف التنفيذ دة حفاظا على مستقبلة حفاظا على مستقبلة ولانة يعتبر ندوة قصدى قدوة للشباب الة دة شى جميل وربنا ومش عارف لية ساعتها عقلى الوحش قالى خلاص يا واد يا علوة روح اضربللك ورقتين واسرقللك سرقتين عادى بقة بس قبل الحكومة ما تعرف حاجة عنك ولا تقفشك اطلع غنيللك غنوتين كدة واعمللك شعبية وبرضو عقلى الوحش قالى طيب ما الحكاية عادى اهو اومال لية سجنو الراجل اللى اكتر شعبية من الف تامر حسنى ايمن نور مش هما برضو قالو عنة انة زور الة مش دة تزوير ودة تزوير ولا فى فرق فى الوان الورق وبرضو افتكرت دلوقتى عمنا طلعت السادات اللى اتسجن علشان كلمة ما كتبهاش لا دة يدوب قالها مش عارف لية عقلى الوحش قالى كل الكلام دة لما قريت الرسالة بتاعة عاشقة تامر حسنى هو عقلى لوحدة هو اللى وحش ولا اية على العموم ربنا يخلى جمعة قصدى تامر ويهنى تامر بعاشقة تامر بس ياريت لو يفرجو عن ايمن نور بلاش حفاظا على مستقبلة على الاقل حفاظا على حياتة وقشطة كدة وياريتى ما اتفرجت على ميلودى

وفى عز فرحتى با المدونة

2007-08-11T07:33:00.000-07:00

مبارح وانا فى شدة فرحى بعد ما عملت المدونة وظبطها شوية وكتبتبت تدوينتين تلاتة قولت تعمل اية يا واد يا علوة قولت اعملها مفاجاة للواد اخويا الصغير وهو كان فاتح نت وبيكلمنى اهو ابعتلة الصفحة واشوفة هيقول اية وهذا ما حدث اية يا حميدة بحب ادلعة فينك دة انا اللى بقول موجود يا عم دة هو اللى بيقول بقوللك اية هبعتللك صفحة نت افتحها عندك كدة دة انا اللى بقول ومالو يا عم ابعت دة هو اللى بيقول وبعت الصفحة وطبعا كنتى مستنى بقة شوية كلام حلوين منة يقولى مثلا ياة اية الحلاوة دى اية دة انت بقيت جامد اوى كدة يا مظبطنا يا مهنيا كلام كدة يخلى الواحد كانة واكل 2كيلو لحمة مشوية فى مطعم الهداية اللى عندنا فى دمنهور اللى عمرى ما دخلتة وبكتفى با المرور من جنبة واستنيت شوية وسالتة ها فتحت الصفحة طبعا انا اللى بقول ايوة يا عم هو اللى بيقول وفجاة قالى حاجة ما كنتش متوقعها سؤال خلانى اصرف نظر فى موضوع اللحمة المشوية ومطعم الهداية واهتدى كدة واقضيها طلب كبدة من عند ابو سناء نبيل صاحبى فى يوم كدة يكون رايق وما يرضاش ياخد فلوس منى با اعتبار اننا اصحاب والصاحب لة عند صاحبة تلات حاجات لقمة ونومة ومش مهم التالتة اخويا العزيز قالى هو مين طلعت دة (فى الوقت دة كانت اول تدوينة فى الصفحة كنت ببارك قيها لطلعت السادات على الخروج من السجن)سؤال خلانى فى حيث بيس قولتلة انى اساسا غلط انى بعتلة الصفحة لانى لو كنت سالتة عن اسم اى مطرب ولا ممثل ولا موزة بتطلع على الهوا كان عرفها قولتلة روح نزلنا اغنيتين من النت نسمعهم لما نروح وانا هجيبللك كام فيلم واظبطك وسيبك انت من الكلام الفارغ دة طلعت اية وبرائة اية خلينا فى بوس الواوا بس الغريبة هو لية سال طلعت مين بس هو يعنى كان عرف نور مين اللى بتكلم علية فى نفس التدوينة اقوللكم انا هشغل نفسى لية انا اروح اديها كبدة احسن

مبروك يا لطلعت السادات ووحشتنا جدا يا ايمن يانور

2007-08-11T07:28:00.000-07:00

بروك البراءة يا نصير الغلابة والمظلومين ويا رب ما تكونش زعلان مننا لا موقفنا من سجنك كان موقف ضعيف راينا المنكر ولم نحاول ان نغيرة الا با اخر الحديث حاولنا بس با القلوب وبس يارب ما تكونش الايام فى الى فاتت غيرتك وتكون زى ما انت اسد فى فى غابة غاب عنها الاسود وبيحكمها الضباع ارحع لنا زى ما كنت قبل ما تروح مننا ايمن نور وحشتنا يا اكبر مظلوم يا حلم حلمنا بية وللاسف صحينا قبل ما نكملة ما تخافش احنا لسة مستعدين نحلم تانى وتانى لحد ما نحقق حلمنا اوعى تياس خليك قوى زى ما كنت دايما انا مش بعتبرك مسجون لا انت زى كل اللى قالو لا زمان كلهم اتنفو عاشو فى المنفى ودلوقتى غيرو المنفى للسجن بيحاولو يبعدوك بس انت فى قلوبنا حريتك همنا لانك دايما هتفضل انت وكل اسود البلد دى اللى لسة شايلين همها قدوتنا ومثلنا الى ان ايخرج الضباع من ارض السلام مبروك يا طلعت ووحشتنا يا نوور

وجهة نظر

2007-08-11T07:17:00.001-07:00

مبارح وانا بقرا الدستور ومقالة بلال فضل الراجل حتة السكرة دة وكان بيتكلم فيها عن الراجل الجزائرى اللى راح سلم على الريس فى فرنسا وكانت كل امانية انة يسلم ويستبارك با السيد الرئيس وبلال فضل زى ما عودنا عمل مقال مدهشش بس انا حبيت اوضح وجة نظر تانية غير اللى اتكلم عنها استاذى الجميل بلال لانة اتكلم عن الراجل دة لما سلم على الريس قالة ان السلام علية كان كل امانية وبلال اتضايق اوى ان الراجل لا اتكلم عن مشاكل الجزائر ولا عن اى حاجة ومع ان دى وجهة نظر سليمة مية فى المية بس الموضوع اشاسا كان المفروض ما يحصلش من اصلة ازاى مواطن مهما بلغت بية الجراءة يحاول يوصل لايد الريس ويسلم علية وازاى وصل لدرجة قرب من ودن الريس لدرجة انة سمعة وهو بينادى يا ريس يا ريس ازاى دة يحصل لا وفين فى فرنسا اية كان فين الحرس ولا علشان هما فى فرنسا بقة يدوها ديمقراطية وكلام فارغ من دة ويسيبو اى حد يوصل للريس ومع ان متهيالى ان لهجة الراجل وصوتة اللى بيقولو انة مش مصرى هما اللى حننو قلب الحرس والا كان مصيرة كان هيبقى مصير الراجل بتاع بورسعيد اللى راح اللى اختلفت فية الروايات فى ناس بتقول كان واقف زى كل الناس والريس معدى راح حد زقة وقع بعد الخط المسموح بية وناس تانية تقول انة هو اللى عدى الخظ بمزاجة كان عاوز يدى شكوى للريس يدا بيد وناس تقول كان فى ايدة سكينة ومع ان الموضوعين زى بعض وفى فرنسا كان راجل وفى مصر كان راجل تانى بس الراجل المصرى خد رصاصة وخد سكة ومات اللة يرحمة ويرحم موتانا والراجل الجزائرى اتكتبلة عمر جديد لما لحقة الريس ونادى علية ومن الموضوع دة نعرف ان الدنيا لسة بخير ولسة فى حرس بيسمع لاصوات الشعب وبيعرف المصرى من الجزائرى واقول لكل حد عندة شكوى عاوز يبلغها للريس عندك حل من اتنين ولو عملتهم الاتنين يكون احسن اما تتعلم اللهجات العربية بكل انواعها علشان لما تنادى على الريس محدش يعرف انك مصرى واما انك تستنى السفرية الجاية لفرنسا وتنادى هناك وربنا يوفق كل اهل الشكاوى وتوصل لودان الريس بسلامة وجهة نظر برضو يا عم بلال صح مش كدة ولا اية

اةةةةةةةةةةةةةةةةةةة

2007-08-11T07:17:00.000-07:00

كلمة اة دى هيا نفس الاة الى قالها الممثل الجميل عادل امام فى النوم فى العسل ومع انة قالها تضامنا مع اهات مصابى الضعف الجنسى الا انا بقولها دلوقتى تضامننا مع مصابى الضياع الوطنى والوطنى مش معناها الحزب الوطنى اللى برغم كل تقديرى لعملة الدائم والطموح فى ضياع كل ما تبقى من كرامتنا نحن المصريين اللى دايما بنفخر اننا مصريين ولكن الوطنى هنا تعنى وطنا مصر وكرامة شباب مصر الى عايش ومش عايش اة غضب على احوال شباب الحكومة دلوقتى وكانها بتقولة رسالة واحدة تحشش وتتكيف تعيش وسط اهللك وجيرانك ومع موزتك من غير اى مشكلة لكن تصحى الصبح بدرى تعمل فيها معارض وتقول لا هيتقاللك الف لا لعيشتك واهللك وناسك وكمان من كتر مشكللك هتضيع موزتك وتتجوز اللى يصونها ويعيشها من غير لا ولا كلام فاضى وعلشان كدة انا اخترت كلمة القدير عادل امام لانها لا هيا اة اللى هيا معناها موافق على كل حاجة واى حاجة ولا هيا لا معارض ورافع راية العصيان على كل حاجة اة هنا معناها خلاص تعبنا زهقنا من الخوف والوجع والم الوقوف جنب الحيط او زى ما قال القدير جدا ابراهيم عيسى جوة الحيط اة خلاص حرام مش هنحط راسنا فى الرمل مش هنغمض عيونا اةةةةةةة باسم 70 مليون اة هنتكلم هنقول مشاكلنا اة ةةةةةةة عندك مشاكل طبعااااااااااا اةةةةةةةة واهيييييييييييين كمان